絲絲講場：花旗選工管生NGO實習
絲絲前排睇電視，有個節目係講班有錢人去體驗基層市民生活，話要做社會責任，原來花旗一直都有搞呢種企業社會責任嘅活動，尋日絲絲就出席咗花旗搞嘅「花旗集團大學生社責實踐2010-11」開動禮，聽聞今次有約200名嚟自本地8家大學嘅工商管理學生申請，選出70人喺本月起到35家非牟利服務機構（NGO）實習，為期4個月。
助NGO革新營運
絲絲唔明點解工管學生去NGO實習，花旗香港區資本市場及企業銀行業務總裁麥永森（Alvin）就解釋話，企業除咗自己出錢出力幫助弱勢社群，亦要培育新一代了解社會問題，佢話工管學生應該利用佢哋學到嘅嘢，去幫助NGO改變營運模式以及增加新嘅營運理念，令佢哋面對不同挑戰時可創造機遇。
咁Alvin有冇做義工幫助弱勢社群？佢就好謙咁話，自己做義工仲係新人，不過都有去過老人院、幼兒院探訪同埋執垃圾，佢最記得去年到老人院與老婆婆一齊串珠仔，整咗個好靚嘅擺設，仲送咗畀佢留念，依家就擺咗喺Office日日對住。
余絲韻