市場上大部分嘅基金投資平台都有唔少基金可以畀投資者選擇，但大部分嘅類型都係股票基金。每隻基金都會清楚列明佢嘅目標，以中國股票基金為例，基金嘅投資額當中，最少要有80%至90%資金需要投放喺股票市場。換言之，一旦遇到環球股票市場「瀑布式」下跌的話，呢隻基金亦唔可以幸免於難。所以，如果投資者將所有資金都投放喺股票基金嘅話，當中分散風險嘅作用係有限嘅。
據過往熊市經驗，投資者要喺持續跌市中保護投資組合，最有效係投資喺債券基金同對沖基金，因為當投資者對經濟前景展望轉差，導致股票價格下滑時，各國央行都會先行減息嚟放鬆銀根去刺激經濟；而減息正正對債券價格非常有利；再者，市場資金喺嗰時亦會傾向流入較為保守嘅債市。
至於另一選擇對沖基金，由於可以做短倉對沖，所以喺淡市之中起到非常顯著作用。但係投資者亦要留意對沖基金嘅實質操作內容，若果佢嘅資金太集中喺單一市場的話，風險亦都會增加。
事實上，投資者應該選擇可以分散喺幾個市場嘅對沖基金，而有香港證監會認可嘅基金亦都可以畀到多啲保障畀投資者。投資者要留意，自己心儀嘅基金投資平台可唔可以畀到呢方面嘅選擇喇！
香港大學電子金融服務榮譽助理教授 徐燦傑