福島核電廠事件仍在惡化中，另一方面，日央行亦連日向市場注資，截至昨日傍晚，合計注入資金已達34萬億日圓。原來無論應付核危機還是金融危機，辦法都係得一個，就係要靠泵水。
核電廠能否避過危機仍係未知之數，但向市場泵水就初步見到效果，日圓匯價尋日掂一掂76.36的歷史新高後迅即回到79水平，而日股昨日跌幅亦比港股溫和，但就算捱得過當前呢關，未來日本經濟仍然係相當手尾長。
由於憂慮日本零部件供應鏈癱瘓，汽車股自地震發生後持續向下，但係連華晨汽車（01114）亦要跌埋一份，就唔係太合理。眾所周知，華晨手上王牌係同德國寶馬嘅合營，汽車百分百內銷，零部件九成以上係來自內地，應不受影響。雖然內地車市有機會放緩，但主要係中下價車市場，對寶馬這類高檔房車仍係供不應求。華晨已就去年業績發盈喜，展望今年業績可更上一層樓，昨日跌3.1%，收報6.22元，不妨候6元水平吸納，目標7元。
詩詩