近日環球金融市場震盪，散戶唔知入唔入市好，一向風趣幽默嘅恒豐證券研究部董事林家亨（Simon）就話：「壞消息係珍貴資源，你要利用佢，而唔係畀佢利用，總之依家就係買貨嘅好時機啦！」
之不過，港股嘅壞消息滿天飛，尋日竟然爆發搶鹽潮，Simon尋日Send咗個搞鬼短訊畀絲絲，叫絲絲快啲買鹽，啲鹽價爆升喇！絲絲當然係唔信食鹽可以防輻射嘅傳言啦，對呢啲傳言一笑置之，但都好多謝Simon咁好心通知。
Simon咁好人，絲絲梗係要關心吓佢嘅食鹽儲備狀況，性格盞鬼嘅Simon就笑言：「我都買唔到貨呀，依家都唔知點算？如果冇鹽買，咁就買豉油啦，如果連豉油都冇，咁就要去買老抽喇！」
一聽就知Simon係講笑啦，絲絲當然唔相信佢會去搶購食鹽。佢澄清話：「我讀中學時嘅物理科及地理科成績好好，根本唔相信輻射會由日本傳嚟香港。我懷疑有啲人普通話講得唔好，將食鹽可以『防腹瀉』講成『防輻射』，搞到依家人心惶惶喎。」
余絲韻