市場熱線：中聯重科長線收集

日股最多亦跌5%，收市跌幅收窄到131點，韓股倒升，台股則跌幅大為收窄到0.5%，唯獨港股全日反彈乏力，只好解釋係再一次成為「提款機」，期指收市再低水116點，但歐股早段率先反彈，標普期指亦升緊10點，外圍即使回升港股都未必跟得上，幾令人心灰。

祖國移動吼位買啲

QQ（00700）增長令人失望，一日唔見23.6元，大笨象（00005）穿80蚊，富士康（02038）穿5蚊，聯想（00992）穿4蚊，思捷（00330）創52周新低，同日本災區一樣滿目瘡痍。祖國移動（00941）話咁快跌穿70蚊，古勝會吼位買番啲來長線收息，公司因為增加資本開支而捱沽，相反電訊設備股就可以做多啲生意，繼中興（00763）之後，中通服（00552）亦創新高。

祖國卒之話暫停審批核電發展申請，核電股又再跌過，一雞死、一雞鳴，風電股風水輪流轉，而且尋日炒到價細嘢，例如香港新能源（00987）、航天萬源（01185）同中國風電（00182）等；燃氣股亦表現唔錯，其實風電供應有限兼要睇地理環境，太陽能又太貴，諗替代品其實燃氣實際好多。

奶粉股亦有人搶，澳優（01717）同環乳（01007）鹹魚翻生，醒目資金順手炒埋金源米業（00677），咁樣落去遲早有人搶米！

工程多產品需求殷

喺咁風高浪急嘅市況下，中聯重科（01157）仍保持強勢認真難得，威靈頓基金亦密密增持，在下喺一月底推介時畀佢目標價係19.8元，結果掂一掂20蚊就回落，然後連跌5日回到17.5元，但隻股並冇跟住散，好快又重上高位等待突破機會，芬佬增持係佢嘅股價最大動力，如果可以突破20蚊，應有力再衝多5至10%。

機械工程都算係災後重建概念股，美國道指成分股Caterpillar亦表現標青，中聯重科會喺10日後派全年成績表，上半年所賺已幾乎及得上○九全年，會唔會借業績突破20蚊大關暫時只係斷估，但芬佬埋晒堆就絕對唔會係玩泥沙，內地城鎮化、西部大開發同海外工程係佢嘅賣點，摩通預測公司未來每年增長率超過3成，所以值得揸耐啲睇有冇突破機會。

戰報

南興（00986）+43%

古晨周一話南興醞釀突破，於當日低位0.053元上車，尋日搶高至0.076元，足足升超過43%。

寶峰時尚（01121）+12%

桃桃周一貼寶峰，尋日逆市向上，高見1.5元，於推介日低位1.34元上車，幾日間已賺近12%。

古勝