李寧（02331）近期負面新聞多多，繼ＣＥＯ張志勇遲交股權披露資料被罰錢後，今次佢哋就被內地媒體話旗下嘅「上海心動體育用品」公司運作三年多，原來冇喺上海工商局註冊，而冇註冊就出售產品會涉及虛假宣傳。李寧發言人即時澄清，話已經做咗商標註冊，所以冇違法，佢又解釋，出現誤會係因印刷錯誤，誤將標籤及鞋盒上嘅「心動」印為「新動」。絲絲心諗，唔通係「心動」及「新動」嘅國語發音相似，所以攪亂咗？
內地媒體報道後，李寧澄清「上海心動體育用品」係負責「心動」品牌嘅日常運動業務，亦有註冊。今次出現呢個誤會，主因係去年第三季產品要更換標籤，印刷出現問題，公司已暫時停售印錯標籤嘅產品，上咗架嘅貨會收番，所有印錯嘅產品會銷毀，而公司產品設計及品質唔會受影響。
李寧去年重塑品牌後，噩夢接踵而來，先係非凡中國（08032）收購李寧受阻、今年集團嘅訂貨會定單下跌，繼而又遭基金洗倉令股價大跌。今次嘅誤會亦令到李寧尋日股價跌逾百分之二，絲絲希望佢哋嘅惡運快啲過去，咁股東先有安樂茶飯食。
余絲韻