滙控（00005）公布嘅業績差過市場預期，搞到英國股價一開市就跌。尋日滙豐亞太區行政總裁王冬勝就出嚟解畫，話喺五月中就會舉行投資者日，與一班支持者見吓面，佢仲話新任頂頭上司歐智華係一個行動型人物（Action Person），莫非想暗示新CEO唔係得個講字嘅人，會用行動證明畀股民睇？
王冬勝話佢哋一直有留意股價，會做到最好，不過就冇特別計劃撐升股價嘞。呢個講法好正路，因為股價係由市場決定，正當嘅公司係唔會控制股價嘅。潮流興分拆上市，絲絲就建議大笨象分拆最賺錢嗰Part嘅亞太區市場獨立上市，點知王生話冇咁諗喎，搞到我呢啲小股東好心急。
講到尾，絲絲最關心加人工嘅問題，王生就超口密咁點都唔講，淨係爆咗句「加人工係勢所必然」。不過依家通脹咁勁，加幅追唔到通脹即係加嚟都冇用，絲絲梗係追問喇，王生即刻擰擰頭，嚇咗絲絲一跳，佢立即補多句：「係冇嘢講呀」，絲絲即時鬆口氣，如果唔係就戥嗰班日捱夜捱嘅打工仔可憐喇。
余絲韻