財經事務及庫務局局長陳家強、證監會行政總裁韋奕禮及金管局副總裁余偉文，原定本周去紐約推介香港，但主角之一嘅陳家強由於公務繁忙，最後並冇同行，臨時委託財庫局副局長梁鳳儀代表佢到美國進行推介。
絲絲心諗，呢排財政預算案「風頭火勢」，陳家強留喺香港協助財爺處理預算案都係好自然嘅事，更何況今次預算案嘅「火頭」之一係注資強積金，而強積金係財庫局管轄嘅範圍之一，陳家強留低「滅火」亦好順理成章。
局長公務繁忙未能抽空出席國際活動，副局長自然要頂上，據聞陳家強今次留喺香港係早幾日至決定，故副局長梁鳳儀今次都算係臨時「幫拖」。梁鳳儀經常外訪，一向有出席開國際研討會，故今次參與推介香港自然駕輕就熟。
余絲韻