絲絲聽聞恒生銀行（00011）已經向員工講咗今年嘅花紅，表現最好嘅第一級員工有多2至5.5個月糧，據知將會喺本月二十四日發放。至於薪酬調整幅度就仲未知，絲絲尋日猛咁問佢哋嘅副董事長兼行政總裁梁高美懿（Margaret），佢非常口密，唔肯講實數，淨係話加幅會好過去年。
恒生派咗成績表，股東們應該收貨，年報顯示，Margaret去年嘅特別花紅有538萬元，連同薪津等其他報酬，酬金高達1,627.5萬元。去年恒生業績勝預期，上下員工獲派花紅都好應該，對員工嚟講絕對係一大鼓舞。
除咗Margaret之外，喺恒生董事會內，同樣係執董嘅梁永祥以及非執董薛關燕萍都獲得特別花紅，分別有45.4萬元及118.3萬元，雖然唔係「天價」花紅，但絲絲覺得係對佢哋去年努力嘅肯定。
余絲韻