高盛前星級交易員施家文離職後創立嘅對沖基金Azentus Capital Management，終獲得香港監證會批准，已經喺上月二十一日正式攞到牌，據講呢隻基金將募集最少10億美元資金，喺第二季營業。
絲絲即時走去八吓呢隻基金有乜嘢猛人，結果發現總共有5位負責人，除咗施家文之外，仲有對沖基金Boyer Allan嘅前首席執行官Roger Denby-Jones等，佢哋都係施家文喺高盛時嘅班底，睇嚟大家嘅投資理念相近，先至會再走埋一齊。至於佢哋個竇，就喺中國工商銀行大廈。
大家都知金融海嘯後出咗條新例，高盛與好多大行一樣，要拆咗個炒房出去。不過中環老友就話，分拆炒房出嚟係一家便宜兩家着，話就話間行唔畀有炒房，但係新嘅Hedge fund嘅班底又係炒房嘅舊員工，投行大可再投資落呢啲基金，一樣好似以前咁有投資收益；依家個炒房分咗出嚟，自由度仲大咗，若然啲基金用番間投行做Prime broker，更加可收番啲佣金及借貨費用。咁睇嚟，兩者間嘅關係真係千絲萬縷喎。
施家文只有45歲，九三年加入高盛，曾經係全球最高收入交易員之一，○六年度收入達一億美元，較高盛舵手布蘭克費恩仲要多逾一倍。佢唔單只搞對沖基金叻，投資物業亦叻過好多炒家，喺○九年首季，佢趁金融海嘯後樓價大幅滑落時，已購入大潭道Rosecliff一幢洋房，市場估計已升值六、七成。
余絲韻