市場熱線：高精密有力闖高峰

尋日最醒神係內地零售股，最大原因係佢哋耷咗太耐，點都要發洩吓，帶頭嘅係百貨股金鷹（03308）、茂業（00848）同佳華（00602），升幅都超過6%，國美（00493）升7.6%，但慎防好似體育用品股咁樣彈一彈就不成氣候。其實樣樣嘢都係睇估值，依家超過20倍以上嘅PE已經嫌貴，但當然每隻股有唔同標準，百貨股競爭幾激烈，老古就唔會高追嘞。

A股短線表現唔會差

古勝經常話水泥同汽車股係博反彈佳選，結果水泥股率先跑出，金隅（02009）尋日借殼榮登A股，勁升67%收報15.05元人仔，H股亦大幅高開，但升得最勁係老古上個禮拜推介嘅潤泥（01313），差少少就可破頂。兩會前夕A股繼續升，PMI雖話連續三個月回落，但扣除農曆新年因素係好過預期，正如在下早兩個禮拜所講，依家係「維穩」為先，A股唔會差得去邊。

話大笨象成績好差咩？又唔算係，往績PE約15倍，未來全年派息39美仙計，息率超過3厘半，之但係大行估得太好，所謂神係佢、鬼又係佢，大行普遍畀大笨象嘅目標價仍係好高。放榜期亦主要睇氣氛，前排係又插、唔係又插，依家孖屐搵返啲好股票買，光國（00257）同信義（00868）連續兩日做好。

自動化產品需求大

講到成績表，中國高精密（00591）截至舊年底嘅半年度賺多55%，有1.67億人仔，公司大部分收入係自動化儀錶，當中又分為顯示儀錶、檢測儀錶、電力儀錶、工業自動化控制系統等，公司話中國對工業自動化產品需求龐大，所以自○九年上市之後已搞緊第二期同第三期擴建工程，第二期工程會喺今個月尾完成，到六月時產能可以翻一番。至於第三期預計一三年左右完全達產，但第三期工程主要係發展新產品執行儀錶，管理層會較為審慎。

高精密有擴產概念、物聯網概念同埋國產化概念，所以由舊年八月以來由4蚊升到7蚊樓上，跟住遇上二三線股洗倉潮，佢跌到6蚊樓下已有支持算做硬淨，洗倉正好考驗各股有幾多水分同實力。高精密預測PE約15倍，有15億銀現金，下年度產能翻一番之後可以賺多幾多要靠估，但睇落幾有信心，工業股寧吼上游設備股，應可回氣再上。

戰報

中國戶外媒體（00254）+18%

古晨二月十七日推介中國戶外媒體，當日低位0.285元，昨搶高至0.335元，跟到足賺近18%。

華潤水泥（01313）+12%

尋日水泥股落鑊，古勝上周四睇中嘅潤泥高見6.38元，較推介時低位5.68元，累升超過12%。

古勝