阿里巴巴（01688）因涉及「搵人笨」事件，令公司兩大巨頭「走人」，從而令股價受壓，亦都令到科技股同樣受壓，作為一個教授電子商貿超過十年嘅「學者達人」，筆者對科技股總係有一份情意結，發覺分析之下嘅科技股嘅優勢喺大方向上仍然存在。
依家嘅科技股包含部分全球最知名嘅創新品牌，例如蘋果公司（Apple）、谷歌（Google）同甲骨文（Oracle）等等具有高市場進入壁壘公司。呢種板塊裏面大多數係管理優良、資產負債表強健而且營收流穩定嘅公司。
當企業有意通過科技投資嚟提升產能進而削減單位成本嘅時候，科投成為一個「最佳夥伴」去執行呢項「特別任務」，而科技股就係最大嘅受益人。軟件、個人電腦同半導體等科技公司嘅主要營收都係來自企業資訊科技支出。
同樣地，科技股行業主要來自於新興市場需求。目前大約70%手機需求同埋55%嘅個人電腦需求都係來自於新興市場。日漸富裕嘅生活同不斷擴大嘅中產階級，最終應該會轉變成對電腦同其他IT產品強勁需求，從而推動科技股行業中企業嘅營收同獲利增長。
就算真係增長率唔好，科技股亦都有唔錯嘅防禦性。科技行業唔單只有創造現金嘅能力，而且公司對獲利增長同擴張都好重視。智慧型手機、上網筆記本型電腦（netbook）等新科技消費品嘅推出，加上科技替換周期嘅驅動力量，應該可以進一步降低經濟衰退對科技需求嘅衝擊。所以睇市記住要睇勢。
香港大學電子金融服務榮譽助理教授 徐燦傑