財政預算案搞到全城「慶合合」，就連新世界發展（00017）主席鄭裕彤乖孫、鄭家純次子鄭志明（Brian）呢位「八十後」青年，都出聲話嫌預算案扶貧力度唔夠，話要「派多啲」先得，所以大家咪再話富豪第三代唔識體會民間疾苦。
Brian出身富裕之家，本身已經係上市公司新創建（00659）執董，上月仲「入局」做埋民豐（00279）非執董，生意規模「億億聲」，自言百億元投資項目冇難度。不過，對於打工仔嘅強積金戶口獲財爺派六千蚊，佢竟然感同身受，深明打工一族「有得派冇得攞」嘅無奈之餘，仲話派現金好過，兼且派得愈多愈好。
所謂虎父無犬子，鄭家純喺去年都好敢言，講咗香港貧富懸殊問題嘅底因係乜，政府須為此負上好大責任，貧富懸殊問題解決唔到，最終都係引發仇富情緒。
「股壇長毛」David Webb尋日亦撰文「彈」埋一份，話政府應該改革薪俸稅制，建議政府可提高個人免稅額，由依家嘅10.8萬元增至16.8萬元，之後稅率劃一喺14%；又或者將免稅額增至17.2萬元，之後稅率劃一喺15%，然後取消標準稅率，佢話咁樣做冇人會因此而要畀多咗稅。
佢仲建議取消按揭利息扣減，因為個人免稅額已增加咗，如果政府同意將最高薪俸稅率由15%減至14%，利得稅亦應由16.5%減至15.5%，以防有人乘機套戥喎。
余絲韻