市場熱線：持盈保泰少做少錯

期指今日結算，臨尾高水49點，淡友今個月贏成千點夠晒飽。港股尋日成交714億元，以金額來講絕對未到恐慌性拋售階段，但一穿22,400點就可能信心決堤。

細價股上演小股災

另一異數係尋日窩輪成交反而減少8%，恒指輪更減少12%，照計呢類波動市會有好多人玩輪博反彈或再插，但據知輪民呢排都好傷。

對好友股友來講，早已經歷股災，二三線股繼續被洗白白，尋日下跌股數超過1,000隻，創52周新低股票超過100隻，20大跌幅全部一成以上，有消息話係證券行call爆孖展，加速二三線股跌勢，今次股友已唔係獲利「回兔」咁簡單，開始蝕入肉，估唔到個兔女郎勢兇夾狼。

跌得多嘅要斬纜，贏得多嘅亦要計數持盈保泰，經緯紡機（00350）同MI（01555）兩隻強勢股分別插19.25%同13.29%，但呢排跌得最傷嘅幾隻股係中國無線（02369）、蒙能（00276）同Z-OBEE（00948），中國無線話晒都係一間盈利唔錯嘅公司，一○年預測PE只係十零倍，又話今年係3G收成年，咁插法真係冇得解釋。

零售股係另一重災區，威高（01173）同JOYCE（00647）均跌一成，火車頭I.T（00999）亦跌7%，有調查話祖國消費信心下跌，原來通脹未必有利消費股，對前景冇信心亦會減低消費。

國務院公布咗一批軟件企業名單，可以享受10%嘅特惠稅率，中航信息（00696）即時公布獲得退稅（恨死香港班打工仔）。講開軟件股，祖國突然改邪歸正，叫人尊重知識產權，支持用正版，軟件股好似今年環境唔錯，但尋日包括中航信在內均難逃一跌，只得QQ（00700）做咗奇葩，QQ勝在夠安全─係對領導人來講嘅「網絡安全」。

預算案被全城勁插

所謂哀莫大於心死，老古今日亦唔準備推介股票，就算推穩陣股，差別亦只在跌多抑或跌少，暫時應持盈保泰，少做少錯，勤做功課。

在餘下篇幅繼續插吓鬍鬚曾，份財政預算案已引起公憤，炒冷飯唔在講，更將主菜嗰6,000蚊放落雪櫃，等到你揸拐杖至攞得番，用來退稅起碼有得使，擺落MPF一個股海跌浪已冇埋。班理財師成日預計話基金每年升值幾多，但都係根據之前大牛市嘅平均統計，其實未來能夠跑贏通脹已係萬幸，唔使蝕已係偷笑。

戰報

中國金融國際（00721）+23%

大市急挫，但古晨周二推介嘅中國金融國際成逆市奇葩，高見0.55元，較當日低位升逾23%。

中國水業（01129）+18%

中國水業尋日繼續逆水而行，抽上高位0.159元，較帥哥上周五推介低位0.135元累升近18%。

古勝