外圍經濟數據轉強，粉絲信心大振，資金有慢慢由債市轉戰歐美股市迹象，有資料顯示，過去3個月嘅債券基金錄得資金「走佬」達230億美元（約1,794億港元），相反股票基金錄得160億美元資金流入。加上埃及總統穆巴拉克落台嘅消息，緩和中東緊張局勢，令到「自傷自殘」嘅港股穩定落嚟。
一早講咗二○一一年喺內需嘅前提下，網購喺內地愈來愈普遍，調查顯示，淘寶網係內地最受歡迎嘅在家購物網絡，衣履同電子產品係當中最受歡迎嘅貨品類別，其次係貴價珠寶、手袋同配飾，人均消費每次約500元人民幣。網上購物平台喺互聯網2.0之下急速冒起，除咗反映內地消費模式轉變之外，亦話畀我哋知內地消費「勢不低頭」，同「十二五」規劃嘅核心價值，擴大內需不謀而合，首尾呼應。
「十二五」期間將持續進行戶籍制度改革，又將城鎮化比率由45%提升至50%，方便縮小城鄉發展差距，同時提升內需消費。配合城市建設將帶動保障性住房、鐵路、地鐵嘅興建，並加速內需消費產業興起，當中以二、三線城市相關產業最具潛力。
此外，今年包括廣東、北京、山東、福建、湖北、吉林、寧夏等，最低工資又上調20%，上海、浙江、廣東等地最低工資已經超過1,000元，顯示出「十二五」人均收入增幅要同GDP睇齊嘅宏大心願。人均收入得到提高，對內需起刺激性作用。隨住更多資金被吸引到內需板塊，消費行業勢成「十二五」終極贏家之一，又要開始向內需股板塊出發。
香港大學電子金融服務榮譽助理教授 徐燦傑