依家投行生意競爭激烈，國有銀行要同外資行鬥法，真係要各出奇謀。新上任嘅工銀國際聯席首席執行官Mary MacLeod就話，未來兩年證券部門要大搞國際化，喺其他外資行挖人，實行嚟個「以夷制夷」喎。
去年香港新股上市集資破晒紀錄，達4,300億元，工銀國際嘅成績亦唔錯，去年按處理融資額計，喺投行排第11位，係工行（01398）投資銀行部門歷來最佳紀錄，仲參與咗巴西石油嘅700億美元集資項目。剛啱喺上月由德銀加盟工銀國際嘅MacLeod話，今年自然想「添食」，未來兩年要請多啲有做國際「大刁」經驗嘅「賓卡」，配合工銀客戶愈嚟愈國際化嘅趨勢，意味着未來會喺外資行大肆挖角。
絲絲一向都知工行老總們心頭高，好似以前幫工銀打工嘅「賓卡」老友就話，領導們曾經話工行係按市值計全球最大銀行，要求投行部門都要跑贏大摩、高盛呢啲外資大行，不過老友話國有銀行喺薪酬制度上有先天缺陷，好難畀到外資行嘅天價獎金，一日冇改變，都好難扭轉「外強中弱」呢個局面。
余絲韻