兔年樓市升勢持續，新春期間置業人士入市意欲繼續高漲，即使近排忙於籌備演唱會嘅「汪阿姐」汪明荃，近日亦百忙中抽空入市。據地產代理界好友報料，汪阿姐近日豪擲約3,295萬元，購入由美國退休基金持有嘅九龍塘尚御3座高層A室，單位面積2,086方呎，折合呎價約15,800元。
絲絲直接打電話畀汪阿姐，佢劈頭第一句話：「我係買咗樓，用嚟投資嘅！」絲絲就問：「依家啲樓好貴喎？」汪阿姐就答：「深水埗都有幾千萬嘅樓，呢個盤我睇咗好耐，廣播道啲樓好企理，住宅區又有公園。」絲絲叫佢買多幾層，佢講笑話邊有咁多錢，又坦言只係樓換樓，而之前嗰層樓都賺到少少。
事實上，汪阿姐去年人氣高企，拍劇收得之餘，開演唱會又旺場，收入應該相當和味，相信今次豪擲三千幾萬購入豪宅亦只係「濕濕碎」，加上尚御位處昔日有「五台山」之稱嘅廣播道，汪阿姐對呢個地方自然有濃厚感情，今次入市可以睇到佢份人都好念舊。
余絲韻