市場熱線：福山能源值博率高

不過，通脹有幾犀利係人都知，無論過年師奶辦年貨，抑或尋日有情人送玫瑰食大餐，都肯定覺得荷包肉痛，睇怕加息係「過得初一，過唔到十五」。

殺完牛之後殺吓熊係指定動作，尋日恒指升292點，收報23,121點，圖表做咗「雙底」，國指更大升316點，但成交縮到得781億元，暫時只係炒吓短線為妙。

金字塔國政局好似搞掂咗，但實際有唔少隱憂，如果由「回教兄弟」上台嘅話，到時以色列有得震冇得瞓，其他極權國家如阿爾及利亞同也門亦相繼有動亂，不過呢類政治市影響只係短期性。

尋日好多股翻生，呢幾日祖國傳媒報道一月汽車銷量升幅仍達雙位數，幾間車廠都傳喜訊，上海通用增幅更達47%，冇咗優惠政策都咁火旺，有人話係因為消費者買車唔買樓，亦有分析話係車主趕住舊年尾優惠政策買「尾班車」，新車到一月先出得切，總之汽車股超賣過後，反彈係好正常，但東風（00489）一升就9.3%，追入又覺得冇乜肉食。

國策股唔怕逢低吸

除咗砵砵車股之外，「家電下鄉」公布一月份銷售增123%，刺激家電股升；一月外貿數據靚，亦帶動招商局（00144）升5.6%；公路股同水泥股A股開波已爆升，前者係傳交通部醞釀延長高速公路收費期限，但前排亦傳過公路要減收費，可能係「等價交換」，未必有着數；水泥股就唔知升乜，但每次博反彈都離不開水泥股同車股。鐵道部有貪官落台拖累鐵路股，昨日南車兩母子（01766及03898）被踩多腳，但低位有支持，國策股逢低就買應該冇錯。

尋日真係好難得，國指成分股全升，水泥股大升，其他資源股都冇走雞，油煤金銅鋁各樣有色金屬唔知買邊樣，古勝一向對煤炭較為喜愛，發電、煉鋼、水泥樣樣用煤，需求量同經濟指標關連最大。買煤股通常升得最快嘅係兗煤（01171），皆因佢賣現貨煤為主，但尋日福山能源（00639）升幅達4.85%稍贏一個鼻，之前已調整兩成，跌得多、彈得快係魚缸定律。

大摩報告建議增持

查實煤炭需求咁多年都冇減少過，跟隨大市調整係低吸煤股好機會，大摩上月初曾建議增持福山，目標價6.8元，出完報告後隻股最高上到6.25元，通常目標價打個9折就到價，醒目仔於是趁高沽貨，但現價距離上次高位又有兩成上升空間，有好高值博率。

報告讚福山每年盈利複合增長率達29%，因為毛利率大幅改善，清潔煤銷售大幅增加，而預測並未反映潛在收購同擴張，當然估值平係佢最吸引地方。

戰報

東岳集團（00189）+10%

帥哥二月八日指東岳受惠於家電下鄉政策，推介時低位4.52元，昨高見4.98元，最多升逾一成。

北控水務（00371）+12%

古晨上周五認為北控水務走勢凌厲，昨日一度升至2.94元，較上周五低位2.62元上升達12.2%。

古勝