今年係兔年，不過大家都話今年係「狡兔年」，事關四日指數都「出師不利」，阿爺加息控制通脹，令股市添咗好多壓力。
一年開始，梗係先重溫吓由上年帶到今年嘅愛股──TCL通訊（02618），如果能企穩9元之上，唔排除會向雙位數字出發。
TCL通訊股價表現仍屬堅強，料中短線仍有上升空間。一○年十二月手機總銷量同比增63%，全年手機同配件銷量更按年大增1.25倍，遠遠超過預期目標。淨計第四季嘅產品銷量為1,250萬台，按季比進一步增加咗31%，符合筆者嘅估計，一一年將會有更多建基於Android平台嘅新款3G同智能手機產品推出，銷售前景都會保持樂觀。
內地千元人民幣廉價智能手機一一出擊，預示中國電訊業同全球手機市場將會大變革，有利內地3G用戶增長，亦會導致內地手機業重組。呢種手機面世將會促使內地手機OEM製造商進軍中檔手機產品領域。TCL通訊一早已經埋下重兵喺呢條線上，中國智能手機市場會比上年擴大超過2倍，至6,200萬台；若果用銷量計算，繼美國之後，中國將會成為全球第二大智能手機市場，睇吓大行講嘅11元幾時到啦！
今年年初一喺東方推介嘅達進精電（00515）都送咗兔年利是一封畀讀者，都係嗰句，國策、環保節能加上兩會，達進都喺射燈之下，加上透過合營半國企化咗呢個產業。而且大型基金公司以3.79元接貨，根據常理推測，大型基金公司揸咗貨，無咁上下回報又點會向佢嘅客仔交代呢？所以，繼續追蹤，以目標價5元進發，希望佢乘風破浪，為大家嘅利是再添動力。
香港大學電子金融服務榮譽助理教授 徐燦傑