證券界人事變動頻繁，而絲絲尋日就好開心見番一個「缸湖」老友，佢就係早幾年非常活躍嘅陳蓓敏（Kitty），現職華富嘉洛資產管理董事。相信大家都有興趣想知點解Kitty退隱咗兩年又再出番來闖蕩呢？佢就解釋番自己兩年前退出並且移民荷蘭，仲要取消晒所有外界聯絡電話，真係想一心一意做個相夫教子嘅好老婆，但係世事無絕對嘅，喺前老闆賞識同游說下，又覺得「人生有幾多個十年？」，應該要把握呢輪嘅牛市中再考驗吓自己眼光，所以決定舊年重出缸湖。
其實嗰兩年話就話退隱啫，Kitty話喺荷蘭成日都有上網睇財經新聞，其實都有保持住自己嘅「財經觸覺」，所以依家出番嚟見傳媒狀態好fit，講嘢都好有pointo架。不過Kitty講依家囡囡得十六個月大，仲需要好多時間去照顧，好多時都會以囡囡行先，所以希望記者朋友多啲用電郵來聯絡喇！
余絲韻