再有金融界猛人自立門戶！據英國《金融時報》報道，聯想（00992）前財務總監馬雪征將會離開德州太平洋集團（TPG），成立一間私募基金，仲會搵埋嚟緊三月中就會退任平保（02318）總經理嘅張子欣一齊營運，實行兩位重量級人馬拍住上搵錢。
大陸大把投資機會，唔少跨國或者本土公司都會開番檔私募基金搵錢，有唔少金融界中人打響名堂之後更加會自己牽頭開新公司，好似TPG另外一個合夥人單偉健無幾耐之前已經走咗，希望為新嘅基金籌到20億美金，而另一位前高盛要員胡祖六就已經籌咗8億美金添。
馬雪征係商界女強人，特別係喺中國嘅公司入面依然係男性高層多嘅文化入面突圍而出，更加唔簡單，當年聯想收購IBM嗰陣，就係由佢負責，○七年佢就加盟咗聯想嘅股東TPG。
至於張子欣就喺舊年十一月嗰陣，突然宣布辭職唔做，但係會留番喺董事會，個消息都幾令人意外，市場都揣測佢下一步會做啲乜嘢。
其實無幾耐前，相信馬雪征同埋張子欣已喺深圳發展銀行嘅交易上曾經合作，當時新橋想退出深發展，平保又想買銀行，結果大家都一拍即合，一買一賣，唔知會唔會就係咁大家擦出火花呢？
余絲韻