市場熱線：粵投防守力勝一籌

道指攞咗「免死金牌」，已經係8連升，人哋馬拉松式升市，香港就插水式下跌，最弊係連祖國魚缸都升番，滬綜指同深成指分別升1.6%同3%，香港特別衰兼且搵唔到死因，通常冇得解釋就話資金流走。尋日下跌股數又超過900隻，好多散戶已頂唔順要沽貨，當然，愈多人覺得心死嘅時候，個市就愈快見底，恐慌性拋售同終極一跌都係呢個原理。

老古已預期二萬三冇乜支持力，但估唔到尋日恒指已見22,708點，同舊年尾低位只差300點左右，隨時連呢個位都篤穿；而國企指數收報12,022點，已低過十二月時低位。原本單天保至尊嘅大笨象（00005）亦獨力難支，收市倒跌；地主股因為話預算案再冇新招鬥地主而一天都光晒，但亦係先升後跌；結果藍籌得港燈（00006）上升，較離奇嘅係思捷（00330）中午派成績表差過預期之後，下晝跌幅大為收窄，除咗派高息之外，風水輪流轉，做鬼佬生意變成復甦概念股。

水務股逆市向上

不過，二三線股有幾個板塊逆市上升；水務股跟祖國同類股翻炒水利概念，代表者係天業節水（00840）同國中（00202）；軟件同集成電路股亦係翻炒，因為國務院發咗鼓勵呢兩個行業嘅通知，代表者係中芯（00981）同華潤微電子（00597）；另外，又係本地電訊股，數碼通（00315）同和電（00215）長升長有。

至於跌到一殼眼淚嘅股多到講唔完，其中不乏實力股，例如北控（00392）跌到40蚊邊，玖紙（02689）亦跌穿10蚊，同創五十二周新低，華創（00291）再跌4.3%收報26.75元，好多股已跌到幾吸引水平，問題係有錢都唔夠膽買。

睇A、H同步上市嘅股真係恨死隔籬，多數都係A股升、H股跌，淨得中海油服（02883）係H股升、A股跌，廣藥（00874）則A、H同升，又係炒流感概念乎？

喺呢個時候，最穩陣嘅股往往會成為跌市奇葩，講到穩陣，粵海投資（00270）肯定係其中一間，就連早排炒水務股都冇佢份，皆因佢最大業務係賣東江水畀香港，供應水量同價格有晒合同規定，直情比公用股更似公用股，所以舊年九至十一月大升市佢可以紋風不動，呢排大跌市亦同佢無關，喺4蚊邊一路磨爛蓆。

息率回報勝存款

揸呢隻股唔升唔跌咪好悶？買股票升值固然係主要目的，但未能升值就要想辦法保值，粵投預測PE約11倍、預測息率接近3厘，雖然話長線收息唔及幾隻公用股，但論估值亦較低，以一隻現金流咁穩定嘅股票，息率會逐步提高，總好過揸現金放落錢莊冇息收兼被通脹一路蠶食。

戰報

天業節水（00840）+21%

古晨上星期二話隻天業節水升勢未完，尋日高見1.57元，較推介日低位1.3元，累升近21%。

華潤微電子（00597）+12%

詩詩周二叫吼實華潤微電子，當日低位0.415元，尋日逆市創0.465元新高，累升超過12%。

古勝