尋日絲絲與滙豐保險香港保險業務董事總經理梁偉邦（Robert）食飯，自然要問吓佢加入滙豐後嘅近況，佢話剛啱安頓咗人生三件大事──轉工、搬家及生仔。原來佢嘅第3個小朋友喺去年十月出世，但相處唔夠兩個月，Robert就要為新工作來港上任，直至年底時佢老婆先帶埋幾個仔女搬嚟香港，依家一家人可以時刻相對，自然心情靚靚。
Robert話佢同老婆都好鍾意香港，覺得呢度安全又舒適。其實佢喺好多地方生活過，不過天氣就未如人意，好似老家澳洲遇上大水災，倫敦就長年落雨，莫斯科直頭凍到臉部僵硬。Robert仲話如果有機會都想一家人去北京及上海遊覽，因為佢從來未去過中國大陸。
講完家庭，Robert喺滙豐嘅生活又點呢？佢話好榮幸加入滙豐呢個大家庭，覺得好有歸屬感，佢更加入咗滙豐嘅龍舟隊，希望善用自己嘅划艇經驗，幫隊伍攞冠軍喎。滙控（00005）行政總裁歐智華亦係剛啱上任，Robert話大家都忙於香港、倫敦兩邊飛，始終緣慳一面，未有機會詳談。
余絲韻