絲絲講場：志高搞2萬人慶典 為22對員工證婚
依家內地生活質素愈嚟愈高，內地空調生產商志高（00449）當然可以分一杯羹，志高成立至今雖然只有16年，但去年生意額已有望達到100億元，佢哋早幾日舉辦咗個大型慶典，請咗員工、用戶及合作夥伴等足足有2萬人一齊開Party，順便提早慶祝元旦，晚會安排咗22對員工結婚，並舉行「十大感動員工」頒獎禮，加埋勁歌熱舞等豐富節目，熱鬧非常！
主席豪言生意破千億
志高由300萬元起家發展到依家，請咗萬幾個員工，主席李興浩好開心咁話達成咗16年前定下嘅目標，更雄心壯志話要喺未來5年內做到千億元生意，成為世界級名牌。
晚會坐滿2萬人已令絲絲「嘩」一聲，點知中場仲安排咗22對員工行禮成婚，佢哋正正就係喺志高相識結緣嘅，所以儀式上「二拜父母」變為「二拜志高」，公司就如再生父母，難怪好多員工都咁忠心喇！而喺「十大感動員工」頒獎禮上，發現有唔少員工都已經服務超過10年，睇到佢哋有唔怕蝕底、肯OT拚搏嘅精神，香港打工仔，收到未？
余絲韻