渣打（02888）前大班戴維思（Mervyn Davies）之前去咗做英國貿易大臣，佢喺離任後仍繼續幫政府做嘢，好似近期佢就為政府做緊一個性別不公平嘅諮詢，睇吓點樣提高女性喺英國公司董事會嘅參與度，佢喺八月份受命至今，已經與差唔多2,600人傾過呢個話題。
有啲地方嘅交易所硬性規定女性董事要佔一定嘅比例，好似挪威嘅奧斯陸交易所咁，就規定要有40%嘅董事係女性。雖然有啲地方能夠成功執行呢個規定，但戴維思就唔係好認同硬性執行，佢與唔少女性傾過呢個問題，亦見到佢哋都唔同意咁做，戴維思亦覺得董事會入面嘅性別不公平情況，並唔係單單限制男董事比例就可以解決。
戴維思嘅想法係成立一個約35至40人嘅委員會，去訓練一班女性，再配對比較適合嘅公司並由佢哋去繼續培訓，培養一班人才出嚟。佢話市場上有好多有才華嘅女性，人才方面絕對冇問題。
雖然依家人人都話男女平等，但有研究顯示，喺富時100指數嘅公司入面，女性高層只佔12.5%，喺富時250指數嘅公司內更只有7.8%高層係女性，即係10個高層都冇1個係女人，所以就要勞動戴維思出手，睇吓點樣改變呢個情況。
余絲韻