隨着中港金融進一步融合，兩地監管機構高層交流、借調甚至羅致出任常設職位或擔任顧問等，已經係大勢所趨。早喺○七年已率先由中國證監會借調到香港證監會，擔任中國事務資深副總裁嘅孫杰，唔講唔知，原來佢已經喺數個月前離職。
大家一定好有興趣想知邊個會接替佢，又或者會唔會再有另一位中證監嘅人士來港，以協助兩地溝通及加強合作？
坊間傳聞話中證監其實都有來港嘅適當人選，但可能係近期證監會比較忙，連CEO都提早離任，暫時有關新接任人嘅消息仍只聞樓梯響。亦有消息話證監會希望今次係以常設職位招聘。
講番孫杰，佢喺○七年五月借調到證監會之前，係中證監基金監管部主任，佢來港幾年，為人非常低調，絲絲好少機會喺公開場合見到佢，更遑論做訪問，所以對佢嘅工作所知有限！
挾着人民幣國際化呢個咁龐大嘅機遇，監管機構近期已經密密邀請內地專才來港，協助發展人民幣業務。好似喺今年六月，金管局就借調中國人民銀行前金融市場司司長穆懷朋為高級顧問；港交所（00388）早前亦委任中證監基金部副主任楊秋梅，出任市場發展科高級總監兼副主管暨市場發展科轄下內地業務發展部主管。
余絲韻