市場熱線：洛鉬翻炒有道理

恒指尋日愈升愈高，收市升347點報22,969點；今日就係期指結算，但期指仍高水37點，顯示好友今日仲有揸拿，如果恒指今日再升嘅話，呢個月雖然睇落係淡友得勢，但其實變咗得個桔，大戶想點仲係估估吓。藍籌股得思捷（00330）再創52周新低，本地地主報復性反彈，尤其聖誕商場逼爆人，幾隻主要收租股都受追捧。

花旗魚缸維持強勢

通常呢類反彈市，跌得多就彈得多，同基本因素冇乜關聯。大陸卒之確定取消購置稅優惠，但汽車股依然回升，相信十二月同一月嘅賣車數據會好懸殊，而真正影響要睇二月之後。依家最多人睇住出年新增貸款究竟批幾多，係7字頭定6字頭？

A股尋日亦反彈，結束5連跌，但力度唔及港股，成交一樣係咁低迷。中港魚缸正一難兄難弟，呢排畀老美威晒，鬼叫你乜都唔畀炒，老美就對投機炒賣無任歡迎，你怕通脹、佢鍾意通脹，你嫌樓價高、佢嫌樓價低，醒目資金自然流向花旗，事關近排國策風險好大，例如有位仁兄打電話去電台「窒」溫情總理調控物價不力，辣慶溫總發誓要管好樓價同物價，搞到原本升得好哋哋嘅內房股即時變軟腳蟹。

花旗消費情緒差，不過聖誕銷售又理想，呢兩個數據互相矛盾但冇相干，因為呢排美股依然處於強勢，甚至美匯指數亦唔使睇。另外，強到無倫嘅仲有商品價格，金價易再上1,400美元大關，油價亦升至91.5美元，資源價格繼續大漲小回。大陸話減少首批稀土出口，隻中國稀土（00769）乘機狂抽16%；但大陸應係試探性質居多，因為講嘅係首批而非全年。

除咗稀土係受保護資源之外，鉬亦已納入受保護之列，當呢個消息十月底公布之後，洛陽唔係紙貴而係鉬貴，洛陽鉬業（03993）即刻一支箭咁飆到8蚊樓上，然後被地心吸力拉返到6蚊起步位，尋日收報6.71元，呢排算係跑贏大市，買資源股始終唔會衰得去邊。

鉬價料可保持升勢

洛鉬喺月中宣布發A股大計，同時宣布用集資所得買鉬礦同開採設備，既然阿爺開到口話限制開採，未來鉬價應可保持升勢，趁早儲貨合乎做生意之道。

公司上半年賺4.18億元人仔，較舊年同期賺多1.12倍，原因係產量增、售價升、毛利高，所有資源股都係睇產量同售價，洛鉬選擇喺呢段時間發股買礦，斷估都係睇好鉬價前景，就信佢哋行內人士嘅眼光，何況股價喺6蚊打好底，為保住A股發行價點都會有支持，依家係翻兜之時。

戰報

安德利果汁（08259）+8.5%

古晨周二推介的安德利，昨日回勇，並高見0.445元，以推介當日低位0.41元計，累積升幅8.5%。

光匯石油（00933）+6.6%

帥哥尋日睇好光匯石油，昨日有追捧，一度升上4元關口，以低位3.75元計，單日升幅6.6%。

古勝