三十出頭嘅永隆伍氏家族傳人伍尚修（Samuel）明年一月離任，卸下企業傳訊部主管一職，成為科大行政人員工商管理碩士課程（EMBA）學生，不過Samuel只係兼職學生，佢仲要幫手成立家族基金，打理家族生意。另一位伍氏傳人伍尚敦亦喺明年一月底離職，屆時將再無伍氏「尚字輩」第三代後人喺永隆工作喇。
英國大風雪導致留學生滯留當地機場，不禁令Samuel想起喺美國讀大學嘅歲月。當年Samuel住所與世貿中心僅相隔3條街，「九一一」事件時，佢就眼見第一架飛機撞向世貿，當場呆晒，即刻跑番屋企執拾細軟，與兩位男同學一齊趕去最安全嘅地方─唐人街「避難」。三個男仔「焗」住時鐘酒店兼捱足兩晚，仲要三人同瞓一張水床，「硬啃」菠蘿包度日。
Samuel面對「九一一」呢類百年一遇嘅災難都臨危不亂，睇嚟佢畢業後打理家族生意之餘，仲可以開班教授危機處理喎。
余絲韻