港交所早前（本月十七日）喺會展舉行咗一年一度嘅周年晚會，提早慶祝聖誕節。李小加今年首次以行政總裁身份出席晚會，大家梗係好有興趣佢有冇乜嘢新搞作。絲絲聽聞今年晚會最高潮嘅大抽獎環節，李小加就私人送咗兩部「潮人」至愛嘅ipad！
至於主席夏佳理就一如以往咁「大手筆」，送出幾套旅遊禮券，即係包機票及酒店嘅Package，請港交所員工去遊埠，例如有4人去新加坡及俄羅斯等地嘅旅遊套餐，唔知邊個咁幸運抽到呢？
絲絲心諗，夏佳理成日到海外推介企業嚟香港上市，佢明年唔知會唔會送出去巴西、非洲等新興國家嘅旅遊禮券呢？
今年晚會與去年其實有啲唔同，未有設主題，去年個個都要着牛仔裝，今年亦冇一如去年歡送周文耀咁影「全家福」，但當晚有魔術表演，個個都盡興而歸。
余絲韻