市場熱線：津發重組好事近

港股尋日低開之後，全日只係幾十點之間上落，成交得440億元，簡直悶到人想瞓覺，恒指全日跌212點收報22,621點，再跌穿條吊頸線，好大機會確認頭肩頂走勢，但喺禮拜四期指結算時，應該唔會咁快跌穿窿。

祖國錢莊息差擴闊

滬綜指又跌48點，跌到近3個月新低，加息後兩日唔見100點，同上次加息以及○七年6次加息嘅反應完全兩個樣，今時今日有股指期貨，已非只可買升、唔可買跌嘅年代，樓市、資源、農產品價格樣樣按住，仲有乜板塊可帶起個市？

花旗個聖誕零售市道據稱好旺，有機會創歷史新高，政府用股市上升製造嘅財富效應有止咳作用；當然，香港嘅聖誕市道亦係靚爆燈，有商場話增長超過三成，但零售股好似已經炒到冇味。

港匯跌穿7.78，穩陣資金更傾向於北上做定存，半年定存有兩厘半息其實唔錯，但祖國同胞反而有接近一半存款喺活期，除咗貪資金靈活之外，有乜頭暈身熱亦唔使怕醫院拒收；所以雖然中國存款利率加得多過貸款利率，表面睇錢莊股唔着數，但計落反而息差擴闊，尋日錢莊股跌幅只係輕微。

昆侖能源（00135）卒之買咗北京燃氣管理60%股權，但股價先升後跌，所謂sell the fact。北燃其餘40%由北控（00392）○七年用116億元買咗，以現時估值即係3年幾升值兩成，收購嘅PE 13倍的確唔貴，不過，拉勻本身業務PE約20倍，仍高過其他石油股同燃氣股。

提到北控，幾隻直轄市窗口股真係風水輪流轉，北控收購燃氣業務之後風生水起，上實（00363）年年玩轉型注資，結果來來去去得個吉，今年賣咗消費品同醫藥業務轉玩房地產更係敗筆。反而，上市後一直最令人失望嘅天津發展（00882）近來極之爭氣，逆市升到7.33元之近3年新高，孖屐盛傳佢會重組，管理層亦爆晒響口，暫時冇人知係乜東東，但原則依然係buy the rumour,sell the fact。

化繁為簡提升估值

重組序幕係今年八月同十二月津發先後賣咗一大一小兩條公路，但話得說回頭，外環線東段已話賣咗好耐，其實係國策要求收歸國有，同重組冇乜關係。不過，公司有錢自然要搵番啲其他業務進行投資，如果能有高回報投資，股東亦自然得益。

津發一直被人詬病佢業務過於繁複，公用事業、商業房地產、升降機、釀酒、碼頭，依家早已唔興「多元化」投資呢一套，集中一、兩瓣肯定對佢提升估值好有幫助。

戰報

數碼通（00315）+22%

本月十六日小尾指數碼通增長勢頭佳，當日低位12.38元，昨日一度高見15.12元，累計升幅22%。

博耳電力（01685）+6%

帥哥上周四指博耳有望再展升浪，昨日股價高見7.24元，較推介當日低位6.8元升6.4%。

古勝