一年一度嘅財經界「蠢事選舉」又嚟啦！《財富》雜誌選出今年19件財經界蠢事，當中包括蘋果公司「教父」喬布斯叫人改變iPhone 4嘅揸機方法、高盛副總裁圖爾一封寫畀朋友嘅電郵竟然成為自己被美國證交會（SEC）起訴嘅關鍵證據等，實在令人哭笑不得。
蘋果公司行政總裁喬布斯貴為財經界精英級猛人，但亦有「老貓燒鬚」嘅時候。iPhone 4喺六月底推出時，被用戶發現如果傾電話時遮住天線接收位，iPhone 4嘅接收能力就會出現問題；面對堆積如山嘅用戶諮詢電郵，喬布斯只係淡然回應：「唔好用呢個方法揸機」，令市場嘅不滿升溫，最後喺眾怒難犯下，佢惟有急急「補鑊」，開記者會公開認錯。
喺今年四月美國證交會控告高盛欺詐一案中，唯一被起訴嘅高盛員工、副總裁圖爾，○七年一月曾經喺寫畀朋友嘅電郵中自誇「眾人皆醉我獨醒」，指當時體系嘅槓桿已愈嚟愈大，隨時瀕臨爆煲，而唯一生還者將會係佢「神奇圖爾」（Fabulous Fab），反映圖爾事前已知次按風暴即將爆發，成為咗佢被SEC起訴嘅有力證據，可謂「自掘墳墓」。
英國石油公司（BP）前舵手海沃德亦係今年蠢人之一，喺墨西哥灣漏油事件發生後，佢感慨咁講咗一句「金句」：「我想過自己想過嘅生活」，旋即被市場大肆批評，連白宮前幕僚長伊曼紐爾及美國總統奧巴馬亦分別向佢「發炮」。最難理解嘅係，喺風頭火勢嘅時候，佢竟然仲有閒情逸致去睇賽艇，最終難逃下台命運。
雅虎今年業績麻麻，舵手巴茨唔知係咪因為咁心情唔好，多次喺接受訪問時公然對傳媒「爆粗」，令形象插水。
余絲韻