絲絲講場：渣打周年晚會大搞Concert
為咗酬謝同事們今年以嚟嘅辛勤工作，渣打前日就特登舉行周年晚會，喺會展筵開160圍，宴請2,000位分行嘅前線及後勤同事，渣打香港區個人銀行業務主管禤惠儀以及唔少分行嘅區長及經理都有捧場，實行與眾同樂。
歌星員工齊獻唱
絲絲向朋友八卦一下當晚情況，點知朋友嘅回答係「聽出耳油」。原來渣打以「演唱會」作為當晚嘅主題，所以有唔少員工粉墨登場，獻唱貓王、梅艷芳、陳寶珠等巨星嘅首本名曲，即使當晚請嚟真正嘅歌星表演，背後嘅伴奏樂隊都係渣打員工。
朋友仲話，當晚渣打有個特別安排，就係全場一齊起身，為在場嘅眾多分行服務經理鼓掌，場面可謂非常感人。
講起客戶服務，大家可能諗起前線嘅服務員，其實分行服務經理係幕後無名英雄，當前線一有需要，佢哋就要提供支援。
其實渣打已經唔係第一年搞咁大型嘅周年晚會，絲絲相信呢啲周年晚會唔係食吓玩吓咁簡單，更深層意義係促進員工彼此間感情，增加對公司嘅歸屬感。
余絲韻