絲絲講場：任總新職頭炮講課 星級菁英班學費8萬
○八年金融海嘯後，全球經濟及金融格局經歷翻天覆地嘅變化，中大全球經濟及金融研究所喺明年一月舉行全球金融菁英領導研討班，專畀金融及監管機構等高層主管參加，不過呢個課程學費認真乸脷，短短21堂嘅5日半課程索價8萬蚊。不過話明係菁英班，報讀嘅人本身有番咁上下Quali，聽埋高人主講嘅課堂，絕對可以攞番超過8萬蚊嘅回報！
嚴選學員 猛人主講
呢個課程仲快過教統局一步，先行「小班教學」，但並非有錢就有得讀。中大全球經濟及金融研究所所長廖柏偉話課程名額有限，仲要經過篩選，配對學員工作背景及行業先得，應該只有幾十人成為學員。
雖然八萬蚊都夠去歐洲兼紙水高企嘅日本玩番轉，但呢個課程又唔係貴得冇道理，首先開幕禮邀請到中銀監主席劉明康，不過實際演講日期就有待確定，講師粒粒皆星，例如包括「歐元之父」蒙代爾在內來自三個不同年期嘅諾貝爾經濟學得獎者、美聯儲系統理事會前副主席科恩、香港證監會前主席及現任中證監國際事務顧問沈聯濤、中投香港董事長劉遵義、中國金融學會執行副會長任志剛等。
今次係中大全球經濟及金融研究所第一次舉辦課程，身兼該研究所傑出研究員嘅任志剛話係屬於試驗性質，日後可能有「衍生工具」（其他課程）都唔定。佢個人就會主講屬於全城熱話嘅中國貨幣體制及匯率改革、人民幣國際化及離岸市場。
余絲韻