市場熱線：光國邁向龍頭寶座

祖國驚死通脹，但依然批准成品油加價，官方解釋係對通脹影響輕微，而且會對的士同農業提供補貼，雖然話揸車唔係民生必需，不過咁樣好似對食品同電力企業唔多公平。其實今次成品油的確加遲咗同加少咗，中石化（00386）亦有少少蝕底，但有得加總好過冇得加，而奇就奇在飛機股尋日亦大反彈。

前排地產代理鬼殺咁嘈，但最近樓市成交又恢復活躍，利嘉閣話會開多兩成分行，請多1,000個代理。老古食飯時聽鄰座有地產代理冧客，話美國兩年內都唔慌會加息，但老古對呢個說法有保留，如果老美出年經濟增長真係達到3.5%，商品價格又係咁升嘅話……就算老美唔加息，本地用HIBOR計嘅按揭息率將來亦未必可以做到兩厘樓下，但有消息話本港幾大錢莊已輕微降低按息兼有現金回贈。

體育用品股有反彈，361度（01361）公布出年秋季訂貨會金額升咗23%沖喜，但老古覺得係技術反彈居多。中航信（00696）湊熱鬧，無端端送紅股，股價亦跟住炒起，呢個潮流其實好唔健康。間公司已壟斷祖國機票市場，好難搵到大增長空間，內地傳媒話廉價航空春秋自己搞網上訂票搶生意，既然投資者擔心高鐵競爭而沽飛機股，中航信更加冇理由值得睇好。

中聯重科可以一試

出年新股依然會好熱鬧，但上市公司業務愈來愈冷門，短期先後會有圍裙同拉鏈公司上市，A股最近有間榨菜公司上市炒到飛起，都唔知係炒乜嘢概念。今日有中聯重科（01157）登場，暗盤只係高3%，老古覺得買得過，但佢A股尋日收報14.41元人仔，僅高H股一成。

食正國家環保政策

光大國際（00257）尋日反彈，可能同間公司公布投資蘇州垃圾發電3期項目有關，其實隻股近月每次跌到4蚊附近都好快反彈，但升到4.5元左右又冇力。其實光國已經變咗做一隻百足咁多爪嘅環保股，除咗污水處理之外，仲做埋垃圾發電、沼氣發電、風電同太陽能，顯然係中央有心栽培做環保龍頭股。皆因好多所謂環保企業根本唔夠班，投工程嘅目的只係為咗向政府攞補貼，對環境造成負累多過保護，尤其垃圾焚燒發電項目過程會釋放二噁英，所以搵大企業做會較為放心。

前排祖國傳會加污水處理費，如果批准，光國同天津創環（01065）等股都會受惠，光國食正「十二五」嘅環保同新能源國策，雖然現價係貴啲（預測PE約27倍），但國策股值多幾錢，做到龍頭股嘅話就唔同計法。

戰報

中國安芯（01149）

帥哥上周四推介中國安芯時，當日低位只有2.4元，昨日創2.75元新高，累升14.5%。

+14.5%

海爾電器（01169）

小尾周一指海爾前景亮麗，股價昨日創8.79元新高，較推介當日低位8.12元升8.25%。

+8.25%

古勝