絲絲講場：王石花甲之年遊學三載
正所謂終生學習，喺下月就踏入花甲之年嘅內地房地產龍頭企業萬科董事長王石，正慢慢實踐淡出萬科業務嘅承諾，除咗登山、滑翔及航海之外，有老友話原來佢仲決定喺未來3年重返校園，實行繼續學習。
歐美遊學先去哈佛
聽老友講，王石前幾日喺深圳盬田萬科中心向一眾年輕創業學員演講，除咗與大家分享萬科嘅成長經驗，佢仲透露嚟緊去歐美嘅遊學計劃。佢話會先去哈佛大學選修城市規劃及企業倫理道德呢兩個課程，然後再去西班牙等國家揀兩間學校，進行各為期一年嘅學習，了解歐美文化及行業發展，整個遊學計劃為期3年。
其實萬科與王石都一樣咁積極「走出去」，今年銷售額已逾千億元嘅萬科，依家正積極計劃嚟香港融資，形式係發H股或收購就未定，近年萬科一直推進住宅產業化，王石估計3年後萬科將具備實力去海外發展，並考慮進軍俄羅斯、印度、巴西及南非等市場。
余絲韻