絲絲講場：終傾掂數 國美通過加董事
國美（00493）股權爭奪戰擾攘咗四個多月，雙方終於「傾掂數」，尋日嘅股東特別大會以大比數通過大股東黃光裕嘅兩名親信入董事局，呢個結果都預咗，尋日嘅場面唔單只冇「9‧28」嗰次咁墟冚，幾乎可以用冷清嚟形容。
意料之內「觀眾」少
尋日股東大會嘅投票率達六成七，董事人數增至13人、委任鄒曉春及黃燕虹入局嘅3個議案都得到九成以上股東贊成。絲絲一早到現場，與「9‧28」股東會對比，氣氛差得遠，到場股東及傳媒數目當然分別好大，皆因上次兩個陣營都冇十足把握，黃光裕好似臨尾佔少少上風，兩方等候投票結果仲緊張過等會考成績，結果就有少少意料之外，黃光裕輸咗，踢唔走陳曉。今次擺明係兩大陣營已傾掂數，仲邊有戲睇，「觀眾」梗係少好多啦！
攞到九成支持率嘅鄒曉春以勝利者身份話，良好嘅公司治理絕對唔會排擠大股東喺董事會嘅合理席位及權力。但有國美內部人士認為雖然兩者目標一致，但仍存分歧，內部管理之爭剛啱先開始。
余絲韻