本來有望問鼎新一屆會計師公會會長嘅周福安，尋日喺會計師公會理事會選舉爆冷「撻Q」，未能成功連任理事，令一眾會計界尤其係嚟自商界嘅人士大跌眼鏡，紛紛為佢抱不平，其中一個係中遠太平洋（01199）獨立非執行董事周光暉，佢喺○二年亦曾有相同嘅「撻Q」經驗，當年佢係公會副會長，同樣喺選舉中落敗，入唔到理事會。
周光暉話，周福安係恒指成分股思捷（00330）嘅CFO，○四年起已加入公會理事會，之後做埋副會長，勤力又有貢獻，對佢落選感到意外，歸根究柢係票源集中喺執業會計師（如四大會計師行）及學術界等，認為「小圈子」選舉合法但不合情、不合理。佢話公會有3萬幾名會員，大部分來自非執業，當中六至七成來自商界，商界係經濟命脈，佢認為係時候改革理事會選舉「遊戲規則」。依家理事會有14名理事由選舉產生，來自執業及非執業各有7名，佢認為非執業組別可考慮再按比例分組。
尋日成功當選嘅7名理事，有5人係來自執業，包括羅兵咸嘅何超平、畢馬威嘅鄒小磊、德勤嘅蔡永忠、鄭中正及陳錦榮，另兩人來自非執業，分別係岳思理及左龍佩蘭。蔡永忠就當選為新會長，趙麗娟及Keith Pogson當選為副會長。公會明年一月會公布兩名增選理事人選，外界關注會唔會推舉周福安為其中一名增選理事。
余絲韻