絲絲講場：進軍大埔將軍澳 致富再添兩新舖
絲絲又有燒豬食！喺去年不斷逆市擴充業務，一口氣連開5間分行嘅致富證券，今年再接再厲，又再開多兩間新舖，絲絲當然要去湊熱鬧啦！今年開張嘅兩間新舖分別位於大埔及將軍澳，加埋原有嘅分店，已共有19間分店咁多，原本諗住喺上月剪綵開張，點知撞啱打風。不過唔緊要，再擇過吉日，第18及19間分店趁尋日好日終於正式開幕喇！
周末聯歡晚會賀32周年
今次致富進軍呢兩區，當然係因為呢度市場大啦！致富董事總經理周松堦同絲絲講，話好似大埔咁，佢哋一向都有好多客住喺呢區，所以揀條旺街開舖。佢仲話呢兩間新舖都係自己買咗嘅，明年仲想再開多間分店。絲絲雖然怕肥，但都好想再有燒豬食，真係要預先講多聲恭喜！
正所謂好事「一不離二，二不離三」，嚟緊本周末致富證券會喺會展舉行32周年聯歡晚會，表演節目包括「超級致富大道」歌唱比賽，唔知到時多唔多人上台爭咪呢？
余絲韻