創業板係內地當之無愧嘅「造富機器」，面世短短一年就創造出超過400名億萬富豪，好似胡潤最新公布嘅「醫藥富豪榜」首富李鋰家族，就係靠持有嘅醫藥公司海普瑞今年五月喺創業板上市後股價急升，先至能夠以400億元（人民幣‧下同）身家跑出。
絲絲粗略計吓數，原來今年嘅胡潤醫藥富豪榜內，有八成四嘅富豪係上市公司大股東，因為今年醫藥股當炒，個個身家暴漲。即使上榜門檻提高到15億元，上榜人數反而比去年多咗20人，前30名醫藥富豪嘅平均財富比去年仲大幅增長咗七成六。
登上醫藥富豪榜榜首嘅李鋰及李坦兩夫婦，喺今年五月公司上市嗰日，以收市價計身家高達478億元，當時仲超越比亞迪掌門人王傳福成為中國新首富，就算依家身家略為縮水，喺「胡潤百富榜」內仍排第二位，亦係○四年以來首次有醫藥富豪進入百富榜前十名。
余絲韻