市場熱線：晨訊成交配合升勢

比亞迪大失所望

藍籌大隻佬冇乜特別，中石化（00386）炒成品油加價，內銀股喺派發第三季成績表之前偷步升少少。不過，國企股有兩隻跌幅嚇親人，尤其中鐵建（01186）原本升得幾靚仔，點知一個晴天霹靂就插咗13.7%，而且最值爭議嘅係公司聽日就派季度成績表，依家至公布撥備40億銀有冇遲啲呀？更令人懷疑之前炒上係咪引人落疊。

至於隻比亞迪（01211）都知佢啲車賣得差，但估唔到成績表差成咁；本來中央話支持本地車同埋新能源車，比亞迪食正概念，但概念唔夠成績表實際。吉汽（00175）尋日差兩仙就創52周新高，祖國建議嘅車船稅益晒1.6升以下嘅細車，但呢個位無謂高追。

炒業績從來都係高難度動作，H股已有馬鋼（00323）、比亞迪、中鋁（02600）殉難，錢莊股雖然估得幾好，但已係預期之內，最緊要係睇出年銀根係「從緊」抑或「適度寬鬆」。A股前日係威係勢，不過滬綜指尋日倒跌近10點收市，A股不嬲「冇得估」，但守得住3,000點就仲有得炒。

韌力最夠嘅係零售股，英皇鐘錶（00887）、先施（00244）同景福（00280）等3隻依然踞住升幅榜，帶起零售股嘅「龍頭」I.T（00999）聽日放榜，尋日最高升到7.2元後回軟，收報6.92元，零售股炒到呢個地步主要係炒貨疏，除咗兩隻賣金股之外，其餘啲股近幾年都好少人玩，古勝始終唔係好接受到零售股值咁高PE，好似李寧（02331）同中動向（03818）兩隻，品牌一唔buy就「係咁先」。

尋日中國無線（02369）再升11.4%，多得高盛將佢嘅目標價提高到4.8元，手機股呢幾年想窮都幾難，科技進步推動智能手機價錢大幅降低，3G亦卒之普及化。祖國3G市場今年啱啱起步，上客人數未如理想唔出奇，但到出年應該係收成期，到時3G手機嘅銷量亦會同步急升。

業務發展潛力厚

除咗中無線同TCL通訊（02618）兩隻正宗手機股之外，更上游嘅晨訊科技（02000）亦係受惠股，佢做手機設計解決方案同無線通訊模組解決方案，一向較為低調，但所謂「悶聲發大財」，公司計劃未來12個月將產能提升1倍，目標每年提升10%經營效率，物聯網係祖國未來重點發展項目，所以佢嘅無線通訊模塊亦好有發展潛力。

戰報

珠江鋼管（01938）+18%

桃桃上周二指珠管盈利可保增長，推介當日低位3.24元，昨日曾高見3.83元，累升18%。

舜宇光學（02382）+10%

帥哥喺十月六日推介嘅舜宇光學，昨高見1.93元，較推介日低位1.75元升逾10%。

古勝