阿爺雖然加息，但一早預告中國經濟勢頭「氣勢如虹」，使乜驚！加上喺「人仔」升值嘅「幻影」下，房地產熱錢又走去股市再起風雲，似乎推動中期上升走勢都係維持唔變。用「否極泰來」嚟形容國壽（02628）近日表現，實在係絕。國壽嘅股價曾經大追落後，由於受累於中期業績，佢嘅股價走勢確實係有啲唔似樣，連30元水平亦都曾經一度失守。
作為內地保險業龍頭大佬，唔少投資者都對國壽表現寄予厚望，但早前公布嘅中期業績就令人大失所望。截至今年六月底嘅中期淨利潤得180億元人民幣，同比只係上升7.4%，每股基本同攤薄盈利係64分，講真，真係令人擔心佢嘅營運狀況。
事實上，呢啲數據顯示出國壽嘅新增業務有少少弱，意味佢喺未來十五年嘅新業務價值，年增長率大約只係得4%，發展步伐又似乎會放緩。雖然內地地大物博，保險業嘅長遠發展前景仍然十分理想，但國壽早前嘅弱勢似乎顯示出行業有機會遇上短期嘅「樽頸位」，就係高利潤長線產品銷售逐漸下滑，產品結構重組遇到停滯不前嘅狀況。
坦白講，作為一隻保險類股份，國壽要保住龍頭大哥地位，除咗要致力於推動公司嘅業務增長之外，另一樣重要嘅係喺內地金融創新日趨普及嘅情況下，保險資金可以涉足到嘅投資渠道亦都已經相應增加，要「拿拿聲」了解同適應呢啲投資渠道，先可以維持自己嘅競爭優勢。
內地加息，國壽得益，佢擁有四千幾億元人民幣定存，阿爺加息令佢直接「水漲船高」，如果加息周期剛剛開始，又會為國壽加強咗鑊氣，睇吓佢有冇力飛上○九年十二月高位啦！
香港大學電子金融服務榮譽助理教授 徐燦傑