喺下月初榮升恒生（00011）私人銀行及信託服務主管嘅恒生投資服務顧問董事陸庭龍（Alan），除咗喺媒體為大家分析市場走勢及分享投資心得外，佢自己都會投資埋一份，仲要係比市場行先一步，以取得第一手投資經驗。
好似近期人民幣匯價屢創新高，Alan話佢早喺今年一月已開始設定每日兌換2萬蚊人民幣指令，連續換咗幾個月，以儲定人民幣彈藥用作投資。Alan話換定啲人民幣主要係睇好升值前景，以及考慮到人民幣存款息率較港元存款吸引。其實人行今年六月中宣布重啟匯改，人民幣匯價隨後才展開升浪，但Alan今年初已先知先覺投資人仔。佢仲透露早喺○五年七月人行宣布匯改無耐，亦試過連續數月每日兌換人民幣。
不過Alan話佢遲啲升咗職，可能會減少喺媒體上分析外匯走勢，相信唔少佢嘅Fans都會感到可惜。
余絲韻