絲絲講場：花旗「全球義工日」大陣仗
花旗第五屆「全球義工日」喺上周末順利舉行，花旗集團香港區行長章晟曼話，今年單係香港就有二千一百名員工參加，全球動員逾二萬二千名義工，服務超過七十五個國家，佢哋邀請埋員工嘅親友、客戶一齊參加。
訪復康中心幼兒園
花旗嘅管理層有冇以身作則？當然有啦，好似章晟曼就帶同四百人嘅義工團隊，親身去到香港仔嘅一間復康中心，與一班傷健人士製作手工藝。唔好睇章晟曼平時個樣咁嚴肅，佢協助一個視力唔多好嘅伯伯整手工藝時，非常有愛心及耐性。
另一邊廂，花旗集團亞太區行政總裁卓曦文（Stephen）就去咗東華三院嘅幼兒園，教導來自弱勢社區嘅兒童整蠟燭。身形高大嘅Stephen坐喺幼兒園嘅教室，對住一班只有幾歲大嘅小朋友，好似去咗小人國，不過班細路一啲都唔驚。
余絲韻