呢幾年《胡潤零售富豪榜》嘅頭兩把交椅，畀國美（00493）大股東黃光裕及蘇寧電器董事長張近東壟斷，根據胡潤最新嘅統計，今年張近東以304億元（人民幣‧下同）嘅身家蟬聯首富寶座，力壓財富只有160億元嘅黃光裕，兩者相差近倍。
雖然佢兩個喺排行榜唔係阿一就係阿二，但張近東嘅身家一年內多咗近30巴仙，而黃光裕只增加14巴仙，可以想像身陷囹圄嘅黃光裕幾難發圍喇。依家張近東做埋全國政協委員，又係工商聯副主席，真係幾風光㗎。
一向與蘇寧爭餐飽嘅國美，依家對手嘅市值已經係國美近3倍嘞，就算大家嘅分店差唔多，蘇寧今年上半年就比國美多賺一倍，加上國美內戰未平，睇怕黃光裕都唔得閒計較自己仲係咪零售富豪榜嘅首富。張近東一向帶挈高層有錢齊齊搵，公司有5個人入咗富豪榜，而國美從來就只有黃光裕佢自己。
今年嘅零售富豪榜終於見到阿里巴巴（01688）主席馬雲嘞，佢以50億元身家首度上榜，排第14位。佢打造嘅淘寶網只係用咗兩年時間，就從eBay手上奪取內地超過70%市場份額。胡潤估計淘寶網市值高達400億元，係市值最大嘅非上市零售企業。
余絲韻