市場熱線：勝利管道隨時發威

滬綜挑戰三千二關

本地魚缸繼續「單跳」，下晝開波最多升過264點，但收市僅升110點，國企指數喺資源股帶動下，升幅近1%，成交維持856億元，即月期指高水80點。根據單跳，今日係咪會跌呢？呢排睇住美金炒市嘅話，時升時跌畀佢玩死，可以話冇乜方向，但牛熊證班玩家鍾意見高就入熊、見低就轉買牛，呢排都搵到食。

美金弱旺資源股，煤、金、銅、水泥係例牌，但鋼鐵股成績差就冇份；另外，祖國最大鉛酸電池出口商理士（00842）下個禮拜招股，兩隻同類股超威（00951）同天能（00819）急升，但未來發展肯定係鋰電池為主。

祖國魚缸一升就3%，股指期貨高水擴闊到125點，即係3.6%，乜內地股民唔係用ETF做套戥㗎咩？滬綜指過咗3,000點之後，下一步係望極強阻力位3,200點；睇番上次加息周期，股市狂升到6,000點樓上。同港股一樣，「升到你唔信」嘅誘惑力遠勝於「有限調整」，落唔落疊就睇閣下心理質素。

食品股勝在穩陣升值，雨潤（01068）衝破30蚊大關，間公司嘅最大競爭對手雙匯停牌咗大半年，依家再申請延期至下月十一日復牌，令到「肉金」湧晒去買雨潤。呢排逢親同車有關嘅股都升，舊年尾高追吉汽（00175）嘅股友卒之望見家鄉，睇落未炒嘅得公路股，車多咗有利公路股係顯淺道理，但公路股屬穩陣類別所以落後又係合理，不過相信遲早都會炒埋。

初見突破嘅股千祈唔好錯過，古勝尋日見隻勝利管道（01080）破咗橫行區，創三個月來高位，亦啱啱係中期成績表「插水」3個月，公司喺業績報告已解釋過半年少賺52%嘅原因，係因為國家採取嚴格措施，令到石油同天然氣管道建設延遲所致。

擴大產能迎接新單

如果係「延遲」，即係收入遲咗入帳，有機會「先苦後甜」；管理層當時話，油氣管道建設唔會長時間拖延，就算今年下半年仍未搞掂，到出年都可回升，仲好有信心話會加快擴大產能，以配合出年定單急升添。

勝利管道上月中宣布，已為收購石油設備服務公司簽咗MOU，應屬於擴大產能計劃嘅一部分。油價呢排雖然唔算升得離譜，但好多油公司已經重新增加產能，招標工程亦大增。集團如果能夠賺番○九年咁多，PE只係11.5倍，當然今年已經預咗差，炒復甦同落後，呢隻有得諗。

戰報

中國環境資源（01130）+31%

高仁尋日推介中國環境資源有眼光，開市見全日低位0.074元後反覆走高，跟足可賺31%。

興業銅業（00505）+12%

古晨喺十月四日介紹興業銅業，昨日成交增加，股價最高見2.2元，較推介當日低位升12%。

古勝