絲絲講場：韓克強籲夥計咪捱壞
獅子銀行喺年初為咗谷數，起勢咁「捽」啲前線同事，務求要喺按揭、保險市場重登一哥地位，結果搞到連Teller都要好夜收工，其他銷售人員更不在話下。經過大半年嘅努力，佢哋終於喺按揭及保險呢兩大範疇做番一哥，絲絲聽講佢哋啲投資產品銷售亦係名列No.1。
搏命「捽」數趕都唔走
主管獅子銀行零售網絡嘅韓克強都知道同事日以繼夜咁工作好辛苦，既然依家做番一哥，佢都好識做，近幾個月不時叫啲分行經理畀同事早啲收工，早前先至透過內部廣播再次提醒分行同事盡早放工，最好喺7點半至8點之前收工，如果人手唔夠，分行經理就請番多啲人。
不過聽啲夥計講，要早啲收工其實都有難度，因為做前線人員，唔夠數都係要繼續留喺分行打電話Call客，所以有時真係連經理趕都唔走。
獅子銀行一向都會因應市場變化而有唔同嘅策略，有時係咁搶市佔率，有時就話因為冇肉食就唔去爭，今期就又輪到以搶市佔率掛帥，好似仲係由集團行政總裁紀勤落Order，難怪佢哋加大力度谷啲前線同事啦。
余絲韻