絲絲講場：「賓卡」「芬佬」決戰擂台
「賓卡」與「芬佬」日日喺股場上鬥個你死我活，依家可以公然「隻揪」，其實只係為咗慈善。今年第四屆嘅「對沖基金拳擊之夜」邀請香港金融界包括銀行家及對沖基金經理參加，初賽參賽者超過40人，有20位精英晉級，當中兩位係華人。
尋日絲絲去咗訓練中心，見到個個咁大隻忍唔住「嘩一聲」，原來佢哋要進行5個月嘅地獄式訓練，每周練習兩日。選手之一嘅Erste Group Bank副總裁王一鳴話：「平日落盤交易工作緊張，放工專注打拳就可以紓緩壓力，訓練過程好易受傷，試過被對手打到塊面，開唔到口食飯。依家都會控制飲食，保持最佳狀態，希望喺擂台上打贏對手。」
目標籌100萬善款
活動搞手嘅IME行政總裁Rob Derry話，決賽日定喺下月二十八日，預料會吸引800至1,000人觀賞，目標籌100萬元善款，為「微笑行動」及「奮進行動」籌募經費。
余絲韻