孖妹缸湖遊：大奇迹日撈到係寶？

個別股份殘過當年

雖然孖妹年紀輕，但細個時都睇過九二年嘅電視劇《大時代》，當劇情講到丁蟹與方展博決戰，恒指竟然奇迹咁由九千幾點升上一萬三千幾點，電視螢光幕出現「大奇迹日」四字。只係孖妹估唔到，公仔箱嘅「大奇迹日」會出現喺現實世界，○七年八月十七日恒指下午開市後僅10分鐘已急跌1,285點，低見19,363點，但「港股直通車」消息令恒指喺3點鐘突呈「V」形反彈超過1,000點，收市報20,387點，只跌285點，來回波幅2,375點，收市企穩2萬點以上。

其實隻股票係「寶」定係「草」都唔重要，最重要係佢仲有增長潛力，而孖妹就特別喺○七年「大奇迹日」揀出7隻股票做回顧，分別係滙控（00005）、港交所（00388）、中移（00941）、騰訊（00700）、比亞迪（01211）、中信泰富（00267）及思捷（00330），發現有啲股票若你「有幸」喺「大奇迹日」低位撈到，到依家真係幾和味；但有啲股票今日嘅股價仲低過當日低位。我哋搵到滙業財經集團董事熊麗萍講吓呢幾隻股票嘅升值潛力，以及○七年股市與今日有乜分別。

熊：滙業財經集團董事 熊麗萍

滙控中移仍然睇好

莉莉：經過3年時間，呢幾隻股票股價都經歷過風雨，未來你最睇好邊隻呢？

熊：我會睇好滙控及中移，滙控業務屬於環球性，風險會分散，經歷金融海嘯後，亦見到佢喺歐美銀行之中算硬淨，加上集資後，其資本充足比率增加咗，相信未來業務發展應會平穩；至於中移，買佢會悶啲，但至少穩陣，加上內地整體電訊市場仲有好大潛力，各電訊公司除咗爭客，另外就係靠提升及研發增值服務去賺錢，電訊公司之間會有競爭，但盈利亦會有增長。

高妹：我見依家騰訊及比亞迪嘅股價呢幾年咁勁，以為你會揀佢哋添！

熊：3年前，騰訊同比亞迪都屬於新興行業公司，前者嘅網上遊戲大受歡迎，業務進入高增長時期，不過現時其股價已趨向穩定，但勝在仍夠波幅，故短炒可以；而比亞迪本身做新能源汽車，當年亦得到政策支持，加上市場將佢過分吹噓，令其股價脫離基本因素及大市走勢而大升。我認為佢哋已經過咗高增長期。

莉莉：滙控、港交所及中移股價比高位就有啲「今非昔比」！

熊：滙控、中移及港交所均屬於傳統行業，股價會跟隨經濟變化及受大市影響，例如九七年「港股直通車」消息一出，港交所股價就受惠上升；若滙控冇遇上金融海嘯，冇經歷供股事件，今日其股價應仲係企穩100蚊樓上。所以呢啲股票股價今時唔同往日，唔係因為本身出現問題，而係各自受到外在因素影響。

「直通車」難再憧憬

高妹：不過我又八卦問吓，本港仲會唔會出現第二架「港股直通車」呀？

　熊：我覺得唔會再有，即使真係有，股市對呢架「直通車」嘅反應都唔會太激烈。中國今時唔同往日，經濟層面上已與外資接軌，內地嘅投資產品亦有增加，加上內地投資者來港買股票或買樓都唔係難事，甚至可以做埋投資移民，可見兩地嘅經濟接觸比○七年更加緊密。

莉莉：我都知奇迹唔係永恒，所以更加唔應該太過上心，以免希望愈大，失望愈大。

　熊：我都明白喺「大時代」之中，股市一定會有大升大跌，散戶冇因為大跌市而被震走已經好叻。總之即使將來真係再遇上「大奇迹日」，散戶一定要冷靜，小心分辨市場上消息嘅真確性，就算買貨都千萬唔好瞓身，以及小心高位接貨。

孖妹知道股災是慘痛的，「大奇迹日」更如同愛情一樣變幻無常，出現過亦唔代表永恒，即係男朋友可以今日好愛你，但聽日都可以即刻飛咗你，所以最後孖妹為股友們送上呢隻歌：「來回地獄又折返人間，春天分手，秋天會習慣，苦沖開了便淡……」愛情無分輸贏，但投資就有，總之大家記住「拎得起要放得低」啦。祝各位股友，明天好運。

「大奇迹日」股友心聲

平常心面對

胡先生：「我喺七一年就入行做股票交易員，見證過無數股災，七三年恒指由千七點跌到百幾點都係咁啦。『大奇迹日』？都冇人再提起喇，總之大家以平常心面對，唔好將所有雞蛋放喺同一個籃，否則個市一跌，啲雞蛋就爛晒喇。」

見慣上落快

張先生：「『大奇迹日』唔會再出現啦，依家股市快上快落又唔係乜嘢特別事，最緊要係散戶肯入市。講真吖，股市跌得快時，參與嘅人自然少，當恒指抽番上去，你就唔使擔心冇人買貨喎。投資都係嗰句，啲錢落咗袋先至係你嘅錢。」

「奇迹日」再現

李先生：「上周恒指有日跌二百幾點，我真係『O晒嘴』。我覺得八月份升得七七八八㗎喇，依家股市好易受外圍消息及數據影響，我覺得今年十月會再出現股災，到時恒指跌1,000點都唔出奇，所以我相信『大奇迹日』會再出現，總之散戶真係日日都心驚膽跳，我哋都『畏高』㗎！」

胡先生	張先生	李先生

47%人增加「人仔」投資

唔諗咁多奇迹，不如實際啲存吓「人仔」賺多啲息，反正個個都話人民幣會升，利息加上「人仔」升值，點都好過做港元存款。近排咁多新款人民幣產品出爐，市民對「人仔」嘅興趣理應愈嚟愈大，大家近日有冇增加人民幣投資？根據《東方產經》網上民調截至上周末嘅調查結果，47.5%人話有增加「人仔」投資，52.5%人就話冇。

高妹、莉莉

若有料報畀高妹同莉莉或有嘢問，可電郵money.biz@opg.com.hk