前幾日先至公布上半年多賺近四成嘅阿里巴巴（01688）再添喜事，就係「冧莊」榮獲「二○一○年度大學生最佳僱主獎」嘞。唔講你唔知，原來阿里係呢個獎嘅常客，多次獲內地大學生評為最佳老闆。
阿里巴巴已成為內地大學畢業生嘅搵工首選，作為內地互聯網企業名氣最響嘅企業，可以同佢撼嘅外資企業，大家一定諗到微軟。不過，微軟依家嘅聲勢已大不如前，喺今年嘅票選活動居然跌出三甲。
由當初創業期只有十八名員工，到今時今日擁有幾千名僱員嘅公司，阿里都好堅持佢哋嘅「共享價值觀」，對員工提倡「認真工作，快樂生活」。依家本土企業喺薪酬福利、人才培訓、企業文化建設及品牌實力方面都比以前大幅提高，阿里係行內龍頭，加埋獨特嘅企業文化，就最吸引「八十後」嘅畢業生嘞。
余絲韻