依家好多中國人真係好有錢，不過最近潮流興「仇富」，有錢人通常唔想畀人知道佢幾有錢，免得被普羅大眾仇視。據日前瑞信一份調查報告顯示，中國家庭原來有多達9.3萬億元人民幣（約10.6萬億港元）嘅收入未喺官方數字中體現出來，其中三分之二嘅錢落喺本來已經好有錢嘅人袋中，絕對係富者愈富。
調查報告話呢9.3萬億元「灰色」財富約相當於全國GDP嘅30%，據中國經濟改革研究基金會經濟師王小魯估計，造成官方低估中國家庭收入嘅原因主要係「灰色」收入，乜嘢係「灰色」收入？佢舉例話，如有勢力官員嘅子女結婚時大多會收到數目不菲嘅利是，又或者係從房地產市場或股市上賺到嘅收入等。絲絲睇到真係呆咗，結婚收嘅人情竟然可以係呢9.3萬億「灰色」財富嘅來源之一，真係唔知內地人做人情會多到點呢？
余絲韻